"Əslində atamın rəhbərlik etdiyi Ədalət Partiyasında onun vəfatından sonra nələrin baş verməsi haqqında ətraflı bilgim yoxdur. Ona görə də proseslərə müdaxilə etmək haqqında düşünməmişəm. İddia edirlər ki, guya İlyas bəyin vəsiyyəti var və s. Kimsə israrla vəsiyyətin olduğunu deyirsə, mütləq onu göstərməlidir. Ortada fakt, sənəd yoxdursa, bu iddiallar əsassızdır" - bunu  Ədalət Partiyasının mərhum sədri İlyas İsmayılovun ABŞ-də yaşayan oğlu Mətin İsmayılov siyasi təşkilatda baş verən qalmaqala münasibət bildirərkən deyib.

      O, son vaxtlar işlərinin çox olması səbəbindən partiyada baş verənləri izləyə bilmədiyini söyləyib: "Sadəcə olaraq, vəsiyyət haqqında yayılan söhbətləri eşitmişəm. Atamın sağlığında partiyaya özündən sonra kimin sədrlik edəcəyi ilə bağlı heç vaxt söhbət etməmişəm. İndi eşidirəm ki, partiyanın qərargahı ilə bağlı söz-söhbətlər var. Meydan Babayevin (ali məclisin sədri) adı çəkilir. Amma o adamı tanımıram. Eyni zamanda Mütəllim Rəhimlinin (sədr müavini) partiyadan çıxarılması qərarına münasibətim çox pisdir”.

      Mətin İsmayılov atasının və özünün Mütəllim Rəhimliyə böyük hörmətinin olduğunu bildirib: "Onun partiyadan çıxarılması nəyə əsaslana bilər ki? O adamların çıxardığı qərarlar düzgün deyil. İlyas bəyin ailə üzvü kimi partiyada baş verənlərə müdaxilə etmək imkanlarım məhduddur. Anam da heç vaxt partiya işləri ilə maraqlanmadığına görə indi də bu məsələyə müdaxilə etməyəcək. Həm də o xəstə adamdır, durub bu işlərə qarışacaq halda da deyil”.

     Qeyd edək ki, Ədalət Partiyasının sədri, keçmiş Baş prokuror, sabiq ədliyyə naziri İlyas İsmayılov 2025-ci il fevralın 17-də 87 yaşında vəfat edib.

       Hazırda siyasi təşkilatın rəhbəri vəzifəsi boşdur. Partiya qurultay keçirib, yeni sədr seçməlidir. Amma bu məsələ "Ədalət"də ciddi fikir ayrılığı və qarşıdurma yaradıb.

     Partiyanın sədr müavini M.Rəhimli qurultayın keçirilməsini istəyir, Ali Məclisin sədri Meydan Babayev buna qarşı çıxır. Tərəflər bir-birlərinin qərarlarını tanımırlar. Siyasi Şura  M.Rəhimlinin Ədalət Partiyasından xaric olunması barədə qərar çıxarıb. Ali Məclis bu qərarı dəstəkləyib.

     İndiyədək dörd nəfər - Mütəllim Rəhimli, Meydan Babayev, partiya sədrinin humanitar məsələlər üzrə müavini Vüsalə Dadaşova və Ali Məclis sədrinin birinci müavini Elçin Qurbanov liderlik iddiasını açıqlayıb.