Bildiririk  ki, milyarder bu barədə "Stripe" şirkətinin həmtəsisçisi Patrik Kollison ilə müsahibəsində danışıb.

       "Gənc ikən əsas narahatlığım nüvə müharibəsi idi, amma bu gün dünya dörd-beş böyük təhdidlə üz-üzədir" deyən Qeyts bu təhlükələri iqlim dəyişikliyi, bioterrorizm və pandemiyalar, süni intellektin nəzarəti və cəmiyyətdəki qütbləşmə kimi sıralayıb.

     O, xüsusilə gənc nəslin bu mövzulara daha çox diqqət yetirməsinin vacib olduğunu vurğulayıb. 2023-cü ildə yazdığı bloq yazısında ailəsinin böyüdükcə dünyanı daha yaxşı bir yerə çevirmə istəyinin artdığını ifadə edən Qeyts "Nəvə sahibi olmaq, gələcəyi necə yaxşılaşdıra biləcəyimizi düşündürür; siyasət, səhiyyə və iqlim kimi sahələrdə həll yolları tapmaq lazımdır", deyə yazıb.

Qeyts cəmiyyətin "zəka çatışmazlığı" yaşadığını və süni intellektin bu problemi həll edə biləcəyini düşünür. Süni intellektin bəzi riskləri olsa da, onun düzgün istifadə edildikdə böyük faydalar verəcəyinə inanır.

"Bizim hər şeyi izləyə biləcək qədər tibb mütəxəssisimiz və ya şəhərlərdə riyaziyyat dərsi keçə biləcək yetərli sayda müəllimimiz yoxdur. Bu səbəbdən, bazar sistemini bir həll yolu kimi istifadə edirik" deyən Qeyts süni intellektin zamanla zəkanı demək olar ki, pulsuz hala gətirəcəyini vurğulayıb.

O, gələcək nəsillərin mövcud riskləri düzgün idarə edə bilsələr, daha yaxşı vəziyyətdə olacaqlarını düşünür. "Əgər bu böyük problemlərdən bəzilərini həll edə bilsək, hər şey çox daha yaxşı olacaq" deyən Qeyts gələcəkdə Altsheymer, piylənmə və QİÇS kimi xəstəliklərə qarşı müalicələrin tapılacağını, uşaq iflici, qızılca və malyariya kimi xəstəliklərin tamamilə yox olacağını bildirib.

Qeyts innovasiya sürətinin indi hər zamankindən daha yüksək olduğunu vurğulayaraq, qorxunun insanları iflic etmə təsiri olsa da, gənc nəsil üçün bir motivasiya vasitəsinə çevrilə biləcəyinə inanır. "İnsanlar bu qorxulu məsələlərdən çəkinməyimiz üçün bəzən onların reallaşma ehtimalını və təsirini şişirdə bilərlər", deyə fikrini tamamlayıb.