İmam Zeynəlabidin əleyhissəlam vəfat edəndə ona qüsl verənlər kürəyində kəndir izləri, yaralar gördülər. Bunun səbəbini bir neçə gün sonra kasıbların evinə gecə üzü bağlı adamın gətirdiyi ərzaq kəsiləndə bildilər. Sən demə gecələr hətta köməkçiləri də bilməsin deyə məhz özü üzünü bağlayıb kasıbların qapısının ağzına kilsələrdə ərzaq aparıb qoyurmuş...

   Bizim bir təvazökar ustad vardı, cavan öldü. Öləndən sonra bir neçə universitet tələbəsi gəlmişdi ki, bəs bizim təhsil haqqımızı bu şəxs ödəyirdi, indi nə edəcəyik? Bahalı maşınlarla gəzən "hacıların" hamısı bir-birinin üzünə baxdı...

      İndikilər isə möhürü qazın üstündə isidib alnını mazol edir, özünü təqdim edəndə adının əvvəlində xüsusi pafosla dörd dəfə "hacı" sözünü işlədir ki, özünü dindar kimi sırısın. Bəs İmam yolçusu idin? Hansı İmamdır sənin imamın, əgər Həzrət Zeynəlabidin deyilsə?

      Bəlkə sənin imamın min cürə günah, cinayət edib özünü "möminlərin əmiri" kimi təqdim edən Yezidin obrazına uyğun gəlir? 

Sosial şəbəkədə söymədikləri söyüş növü qalmayıb. Profilə İmam adı yazıb, dini qiyafədə törətmədikləri çirkin əməl qalmayıb.

Bir qism də saqqalının uzunluğuna güc verib imanı saqqalla ölçür. Guya din cins şalvarın ayağını dərzidə az qala dizə qədər gödəltmək və saqqalı az qala 1 metr uzatmaqla məhdudlaşırmış... Özləri də deyir, dünyəvi elmləri öyrənmək məsləhət deyil. Ancaq bu çıxışları da məhz dünyəvi elmlər sayəsində "kafirlər" tərəfindən ərsəyə gətirilən sosial şəbəkələrdə edirlər.

Bax belələrinə görə insanlar dindən qaçır. Din deyəndə savadlı, ziyalı adamların gözünün önünə bunlar gəlir. Çünki dinin obrazını korlayıblar. Özlərini cəmiyyətə sırıyıblar.

     Adam düşünmür ki, ateist bir fiziki, bioloqu İslama dəvət etmək üçün Əbu Hüreyrənin rəvayətləri yox, fizikanı, biolgiyanı bilmək lazımdır.

Adamlar anlamır ki, kafir dedikləri Qərb alimlərinin texonogliasına möhtacdırlar. Kafir dediyi yaponun icad və istehsal etdiyi maşında oturub, ingilisin cinsi də əynində almanın telefonu da qulağında deyir, dünyəvi elmlər öyrənmək caiz deyil...

     Halbuki Allah Quranda elm, fəlsəfə, azad düşüncəyə səsləyir. Əgər Quranda hansısa sərt, mühafizəkar əmr varsa o da məhz belələri üçündür. Normal, intellektual, mədəni, ziyalı adam üçün Quranda heç bir təhdid, heç bir radikal göstəriş yoxdur.

    Bütün dünyəvi elmləri öyrənmək, əxlaqa, ümumbəşəri dəyərlərə zidd olmayan bütün mədəniyyət, incəsənət sahələrini öyrənmək, musiqi, rəsm, şeir, ədəbiyyat, tarix öyrənmək İslam dininin vacib əmr etdiyi qanunlardır!

    Bu xurafatçılar əsl İslamı gizlədib özlərinin görmək istədiyi saxta İslamı din adı ilə təqdim edirlər.

    İslam məhdudlaşdırmır, əksinə geniş üfüqlər açır. İslam öldürmür, yaşadır. İslam söymür, sevir. İslam dağıtmır, qurur! İslam bölmür, birləşdirir...

Fəqət bunlar Allahın böyük bir dinini məzhəb qəfəslərinə salıb həbs ediblər. Terroru, qətli təbliğ edirlər. Sevmək əvəzinə söyüş yayırlar. Qəlbləri sındırıb, könül evləri yıxırlar. Özləri bölünüb dinə gələnləri də bölürlər. Evlər var ki, ata bir məzhəbə, oğul başqa məzhəbə, ana da digər təriqətə əməl edir. Dinsiz olduqları halda normal ailə olan insanıarı guya dinə gətirib bir evdə parçalayıblar. Bu, Allahın yox, Şeytanın yoludur...

    Din adı ilə saxtakarlığa, alverə, xarici siyasi niyyətlərə alət olmağa, fitnəlarlığa, cəhalətə yox demək vaxtıdır. Cəmiyyəti aldatmağa yol vermək olmaz!